No ta difícil compronde cu ora un persona rebasa su atributonan, y ta cay pa e tentación di malusa un poder temporal cu Pueblo a pone den su mannan, e ta cruzando e línea cu ta separe normalmente di e mundo baho di criminalidad. Di mes e línea ey no ta dje diki ey! Es mas, e ta asina fini cu casi bo no por distinguie! 

Na varios ocasion ta worde bisa cu ta pueblo di Aruba mes a dicidi pa loke ta pasa na Aruba actualmente. Na un pais cu un sistema diferente di eleccion, esey lo ta berdad. Na Aruba no. Si haci un conteo di voto, por mira cu e Gobierno na mando ta un Gobierno cu no a haya e mayoria di voto den eleccion y casi no a alcanza e asiento cu e tabata tin mester pa por a forma Gobierno.