ORANJESTAD (AAN): A drenta informe serio na Central di Polis, cu un chofer di un Pickup manera un loco ta persiguiendo un vehiculo Mitsubishi, y cu ademas for di e Pickup tin tiro ta los! Tabata Diadomingo atardi despues di 6’or cu Central di Polis a notifica tur unidad di Oranjestad, cu un auto y su ocupantenan ta na caminda pa Warda di Playa pa busca refugio. E chofer segun su version via celular, a bisa cu e ta worde persigui pa un Pickup. 

Esnan den e pickup segun informe suministra, ta basha bala riba e auto! En corto un “Wild West” entre e Pickup y e Mitsubishi.
Patruyanan cu a yega warda di Oranjestad, a constata un auto color preto, modelo Mitsubishi A-53108 staciona ey dilanti. Den e auto tin tres persona, ta trata di e hoben inicialnan A.R.I. naci na Venezuela y di 19 aña di edad, tambe e mucha homber D. d.l. C.J. naci na Republica Dominicana di 20 aña di edad, y G.R naci na Aruba di 19 aña di edad. 

E trio aki ta bisa Polis cu nan tabata pasa riba Eagle Beach y diripiente dos hoben, esta un tal N. y tambe un tal C., a cuminza manda piedra riba nan auto. Diripiente nan a mira, con e tal C. a cuminza tira riba nan auto cu arma di candela. Polis a mira cu bentana ta kibra, y tin piedra den e vehiculo! Tambe a constata un buraco na bumper patras di e auto. 

E caso tin atencion di autoridad y lo worde investiga. Pa prensa no tabatin mas informe, ni claridad disponible tocante e cuenta di pasa na Eagle y a tira piedra sigui cu persecusion riba e trio. Claro, mester tabata tin algo a tuma lugar cu e problema a bira uno mas serio. Pero investigacion lo trece claridad kico a conduci cu entre e dos grupo di hobennan a surgi problema cu a sali for di man.