ORANJESTAD (AAN): Durante e rueda di prensa di partido AVP, Parlamentario Arthur Dowers a expresa su reaccion riba e desaroyo di hospital na San Nicolas. 

A manifesta cu siman pasa nan a trece den un forma hopi amplio, despues cu a bin pregunta di prensa riba e desaroyo di un centro cardiologico na San Nicolas y nan por a haya reaccion di e minister di salubridad publico basta emocional den media bisando cu nan tabata jaloers cu e kier traha un proyecto na San Nicolas. 

Segun Dowers, ta hopi importante pa nan mustra riba e hecho cu nan a stimula semper desaroyo tecnologico den medicina na Aruba y nan ta hopi pro pa esaki. 

Loke partido AVP ta lamenta, a subraya, ta cu e mesun minister aki cu den pasado a persegui algun arubiano cu kier a traha riba e tereno aki y a yama e ex-minister di salubridad publico pa tur sorto di nomber criminal pasobra cu e kier a sostene desaroyo di tecnologia di medicina na Aruba. 

E parlamentario a bisa cu loke e minister ta papiando awe ta di su mes y e ta proyecta su sentimentonan y kier trece dilanti riba nan.
A agrega cu e ta compronde awor cu e minister aki den pasado semper ta contra di tur e desaroyo den mundo di medicina y sigur cu arubianonan ta logra haci esaki pasobra cu e ta jaloers. 

Mester compronde awe cu ta un proyeccion di su sentimento y su antipatia. Su jalousie cu e tabata tin den pasado contra e arubianonan y contra e minister di salubridad publico e tempo aya cu kier a logra e desaroyonan, a indica. Hecho ta keda, a expresa cu nan ta pone e desaroyo aki na e lugar cu e ta fit mas mihor. E lugar cu ta costa e pueblo aki menos placa y e lugar cu e comunidad ta core menos risico como pacient. 

“Nos tur sa cu Booshi Wever e ultimo lunanan ta grita tur siman casi e ta bisa cu si algo bay malo e ta tuma su retiro. Cada bez cu e bisa cu si e cos bay malo e ta bay malo y keto bay e tey. Y mi ta sigur cu e lo bisa tambe ora cu e prome victima cay den e situacion cu e ta bay crea cu e lo tuma su retiro y nos lo mira mas victima cay y señor Booshi Wever lo keda sinta trankil eynan te na momento cu e pueblo dicidi cu nan ta core cune”, a manifesta. 

Na e momentonan aki tin un lista di 24 profesional cu e minister aki a decapita pa despues bay bisa cu AVP ta contra pasobra cu nan ta jaloers. “Nos ta stima nos hendenan y nos kier pa nos hendenan progresa. Loke nos no kier ta pa innecesariamente placa di pueblo aki wordo gasta y pa ni un hende cay bira victima di un aventura cu nos tin duda ainda kico ta e realidad cu tin patras di e aventura aki”.

Comments (0)