ORANJESTAD (AAN): Manera a keda publica den DIARIO di Diamars, e accion nobo di Polis, esta “Badness Out of Style” a drenta na vigor. E grupo di polisnan combina cu Polis di Bario a hiba control, tanto den transcurso di dia y anochi. \Muy en particular riba formamento di gruponan cu ta causa molester den diferente bario di San Nicolas. Aki ley ta duna Polis autorizacion pa kibra cualkier aglomeracion asina! 

Den Schaepmanstraat esnan forma parti di e accion a señala un grupo di hoben, y mesora nan a worde plama. Den Weg Fontein, De Vuyst, Weg Rooi Hundo, y Esso Heights ta entre otro e areanan cu tabata vigilancia y lo demas barionan. 

DIARIO a haya sa, cu e accion ta continua pa asina reestablece orden y disciplina den barionan unda habitantenan pa basta tempo caba ta sufri, nan a denuncia pidi asistencia ya cu e situacion ta saliendo for di man.
Muchanan ta kibra boter, destrui luz, bombardia cas cu piedra, etc., asina por sigui menciona. E actonan di baldadi ta tumando lugar non-stop. 

A base di asistencianan cu a keda registra, esnan cu ta forma parti di e proyect-team a dicidi di drenta den barionan y pone un fin na e situacion. Observadornan a splica DIARIO, cu e proyecto special aki sigur lo tin su efecto ya cu habitantenan ta duna nan sosten ya cu nan kier tranquilidad. Tin di actua contra esnan cu ta origin di e problematico den barionan. Kizas e proyecto aki por mira luz tambe den otro barionan cu ta cay bao di distrito San Nicolas.