ORANJESTAD (AAN): Ex Prome Minister Henny Eman tambe tabata tin su comentario pa loke ta e situacion di Sr. Robertico “Tico” Croes, kende a haya un sentencia den e Caso Fondo Desaroyo. 

Sr. Eman a bisa cu Sr. Croes ta biniendo Aruba y dialuna awor nan lo tin un conferencia di prensa. A laga sa cu Tico Croes a haya un declaracion di bon conducta di Ministerio Publico pa evita cu loke a sosode den pasado lo keda persiguie e resto di su bida. 

A agrega cu e manera cu e retiro di e apelacion di Ministerio Publico a bay a ‘clear’ e nomber di Tico Croes na un manera hopi cla y nan tur por ta satisfecho cu nan a pasa den un periodo dificil, emocionalmente hopi fuerte nan tras, pero cu awor mester sigui cu e futuro di nos pais. 

Pa loke ta si nan lo pidi daño y perhuicio, a bisa cu e problema ta cu si nan pidie ta pueblo di Aruba e ta bin pasobra Nel Oduber, Rudy Croes ni Rudy Lampe no ta bay pague for di su saco. Henny Eman a expresa cu nan ta cera e buki aki y spera cu ta un les pa esnan cu a cause cu nan no ta haci esaki nunca mas.

Comments (0)