|
ORANJESTAD (AAN): Durante un rueda di prensa urgente convoca pa Partido AVP diahuebs mainta, Parlamentario Benny Sevinger a bay den profundidad analizando e caso cu ta andando pa loke ta e proyecto di dump.
El a bisa cu ta bon pa aclarea cu na December di aña pasa, e proyecto a yega den un fase unda cu a surgi problemanan entre e companianan Bouldin & Lawson y e subcontratista ICONS, caminda ICONS a manda cobra recibonan cu nan no a haya pago pe y consecuentemente e trabao a para y a lanta un caso contra di Bouldin & Lawson pa pago di e trabaonan cu a worde haci.
Mientrastanto, e compania mericano a declara cu nan no ta sigui cu ICONS y tambe a cuminza un caso pa ICONS entrega entre otro e tekeningnan, a bisa. Huez a duna veredicto cu ICONS por pone beslag ariba cierto placanan di B & L y tambe cu nan tin e derecho di retencion pa loke ta trata e mapanan di construccion cu a worde produci door di ICONS, a añadi.
Segun e parlamentario, akinan mester remarca cu e subcontratista ta esun cu tin cu traha e mapanan pa un proyecto cu e mester a haya. A puntra si e contratista mes B & L no tin mapanan y si gobierno tampoco a exigi pa mira e tekeningnan aki. Awe ICONS tin e mapanan den su poder y huez ta duna nan razon pa tene esaki ta muestra cu a ser cumpra algo cu no sa kico e ta, a señala.
Riba e mesun tono a sigui bisa cu e tin dos decision den su poder. Un ta di dia 13 di Februari unda cu abogadonan Croes, Wever & Tchong ta pidi huez pa duna nan un veredicto unda cu ICONS tin cu entrega e mapanan. Huez a bisa cu esaki ta algo cu nan no por haci sin mas ya cu e caso ta andando y tanten cu e caso ta andando, su veredicto ta cu nan tin e derecho di mantene e mapanan. Nan a bay den beroep y a cuminza un bodemprocedure contra e decision di huez. Dia 25 di Juni, dos siman pasa, huez a bisa Sr. Hendrik Croes cu e no ta cambia su decision tanten cu e caso aki ta andando ICONS tin derecho di keda cu e tekeningnan, a Sevinger a declara.
Kico tur esaki ta nifica? El a splica cu mientrastanto a purba di firma un contract cu Albo, informacion cu AVP a haya ta cu Albo a para e trabao y tampoco ta siguiendo cu e proyecto di dump pasobra nan no a haya pago. Esaki ta nifica cu si minister no bay sinta na mesa den e proximo dianan y paga e compania ICONS pa e haya e tekeningnan, di awor caba por bisa cu e proyecto aki a fracasa, a manifesta.
E parlamentario a agrega cu minister a bisa cu e ta tuma su retiro si e proyecto aki fracasa y di awor caba por bise entrega su retiro pasobra e proyecto aki no lo yega na un final caminda cu e pueblo di Aruba lo sali victorioso of cu un proyecto cu lo beneficia nos comunidad.
A enfatiza cu ta conoci cu ministernan di e gabinete aki no ta para tras di nan palabra. Por a tende Minister Nilo Swaen bisa cu den e caso di e pago cu nan mester a haci di indexering, si esaki sobrepasa 80 Florin, e ta un graf e ta coba pa pais Aruba y e lo saca su conclusion, mientras tanto esaki a pasa 100 Florin y keto bay su conclusion a keda di sinta eynan. Minister Rudy Croes a bisa diferente biaha bisa cu e ta saca su conclusion pa loke ta trata diferente asunto, entre otro di DIMAS. Nan a kita mitad di su cartera y keto bay e ta sinta na su oficina.
 |
