|
 ORANJESTAD (AAN) --- Convirtiendo nan ultimo entrenamento den un presentacion pa publico, e seleccion nacional di landamento sincroniza a deleita un publico grandi di famia y amigonan diasabra merdia den “Piscina Olimpico Roly Bisslik”.
 Tur e rutinanan cu cua nos hoben landadornan sincroniza lo competi proximamente na Kingston, Jamaica, den e “Caribbean Islands Swimming Championships” (CISC), a wordo presenta na e publico cu a reacciona cu un aplauso grandi y caluroso. Aruba lo ta enfrentando seleccionnan fuerte di Republica Dominicana, Cuba, Jamaica y Antiyas durante e Campeonato CISC y lo tin cu bataya duro pa prolonga nan titulo.
Manera ta conoci, Aruba ta campeon di Caribe desde aña 2000 caba den e deporte di synchro y ta e pais cu tur otro ta purba di gana. Danki na entrenamentonan hopi intensivo, di dos sesion pa dia, pa un total di mas o menos 5 ora pa dia, e seleccion completo lo lucha y hasi tur lo posibel pa duna un bon presentacion y retene nan titulo maximo.
E seleccion nacional di Aruba cu lo competi na e campeonato CISC ta consisti di un total di 19 atleta, cu ta competi den tres diferente categoria di edad. Nan ta:
12 aña y menos:
Solo: Kyra Hoevertsz
Duet: Kyra Hoevertsz & Femke Rutgers
Equipo: Kyra Hoevertsz, Femke Rutgers, Ariadne de Goeij, Nakaylee Didder, Nataly Geerman, Alexandra Mendoza, Ethlyne Geerman, Neftaly Albertsz
13-15 aña:
 Solo: Kristen Eman y Caroline Waldron
Duet: Kristen Eman, Kiara van Trikt, Caroline Waldron
Equipo: Kristen Eman, Kiara van Trikt, Caroline Waldron, Jitva Sarman, Nathifa Sarman, Roxanne Pietersz, Nikita Pablo, Nathania Taylor
16-18 aña:
Solo: Anouk Eman
Duet: Anouk Eman, Janelle Flemming, Saskia Franken
Entrenadornan di e seleccion di landamento sincroniza ta head coach Jessica Outhwaite, Alva Torres y Kimberly Vinck.
Riba e portretnan por mira algun momento di e bunita presentacion cu e seleccion nacional di synchro a duna diasabra merdia den e Piscina na Savaneta.
 |
