|
Un hende por come menos. Baha su nivel di bida. Un hende sin e seguridad cu su bienestar ta worde garantisa pa su bon conducta y cu den e estado di derecho no por goza di e beneficionan di bon comportacion, ta un prueba cu situacion na e pais ta completamente robez.
Si mira atras, durante e ultimo añanan, inhusticia ta loke mas a tene Aruba ocupa.
Inhusticia, cu a haya contenido maximo den e Caso Fondo Nobo cu mester a bira morto di credibilidad di tur e instancianan halto y funcionnan cu semper a worde respeta. Inhusticia, cu tabata tin como resultado directo di e abuso di poder di instancianan concerni, un caida total di e nivel di bida di Aruba, cu a haya su mes confronta cu BBO.
No por tabata otro. Mientras hendenan cu a traha pa Aruba tabata worde persigui, nan acusadornan a haya oportunidad di destrui e pais, cu awor no solamente ta biba cu e resultadonan financiero, pero tambe un peso di concenshi pasobra ta na nomber di e pais, maldad a worde haci.
E hecho cu loke mester tin tur credibilidad a perde, ta un trabao pa Parlamento. E mayoria den Parlamento cu tabata sa masha bon ki abuso tabata worde haci di persecucion penal pasobra varios di nan mes tabata usa e cabay di bataya di MEP, enbez di busca mas maldad pa haci y formanan pa destrui prueba di delitonan contra pueblo, ainda tin oportunidad pa evita cu persecucion penal ta keda arma politico, cu continuamente lo sigui dal mas hende y libera esun cu e kier.
Si mira con mientras tabata persigui contrincantenan politico, e mes Ministerio Publico a scapa e caso di campañadornan di Rudy Croes, ta realiza cu miembronan di Parlamento di MEP cu a domina Parlamento, a yuda mata husticia na Aruba.
Pakico nan no a protesta ora e denunciantenan Dominicano a worde deporta? Con na un pais liber por permiti deporta hende cu a entrega acusacion pa maltrato humano pa asina scapa esnan cu a keda sin denuncia contra nan? Y esey ta solamente un caso.
E loke a duna DIARIO e forza legal pa pa un bez y semper lanta para den e Caso Fondo Desaroyo Nobo, tabata e veredicto di Corte di Husticia den e caso cu Theresa a cuminza contra nos, pasobra nos a bisa cu e ta midi cu dos midi. Den e caso aki Corte a duna un veredicto hopi significante. Corte a mustra, si nos resumi e veredicto, cu mientras Ministerio Publico tin cierto grado di dependencia di e Ministro di Husticia, tin tur motibo pa duda cu e por ta imparcial.
Loke mester cambia pa por obtene husticia ta e hecho cu ta Ministro di Husticia entre otro ta dicidi riba placa, promocion y asuntonan di beneficio directo den Ministerio Publico. Atrobe ta Theresa por bisa kico esaki ta nifica. Rudy Croes, despues cu Theresa a causa susto cerca tur cu kier a entrega denuncia pa e chequenan di campaña di Rudy Croes (otro caso cu a dera hunto cu e gay), a mustra con ta e ta dicidi y den Corte Hendrik a lastra Theresa, cu te awe ta cobra sin traha.
Ki husticia por tin na Aruba si Ministerio Publico ta prepara e acusacionnan y ta dirigi investigacionnan a base di cual Huez mester tuma decision si Ministerio Publico ta depende di Ministro di Husticia y pa colmo por influencia trabau di hasta Polis, cu ta asistente Fiscal den nan trabau di persecucion di crimen?
Huez no por usa su propio pensamento y duda, pero mester tene su mes na documentonan cu Ministerio Publico presenta y e defensa di abogadonan, pa por tuma un decision. E poder pa kibra of yuda hende ta den man di Ministerio Publico.
E denuncia contra Joran van der Sloot, cu mester a worde laga liber inmediatamente, a worde prepara door di Ministerio Publico, cu a yega den e caso aki na un acusacion cu mester a pone Joran den libertad. Ta Mos a dicidi cu Joran ta haya libertad cu su acusacion!
Ley mester worde cambia pa tin husticia na Aruba.
Ministerio Publico mester cay bau Reino y no bau Ministro di Husticia, cu por bira peligroso sigur ora Rudy Lampe bisa cu e Ministro di Husticia actual ta capaz di “sjoemel” cu documento. Palabra ta na e mayoria den Parlamento cu a faya hunto cu Nel Oduber, Rudy Croes, Rudy Lampe, tur e instancianan oficial cu durante ultimo añanan a basha nos sistema legal abau y haci cu awe cu razon nos mester puntra nos mes, kico a pasa cu Husticia. Ni Huez por yuda mas, ora ta un producto deforma ta worde poni den su man!
 |
