ORANJESTAD(AAN):Diadomingo madruga tabata basta pisa pa loke ta e trabao di polis mirando e cantidad di suceso. Banda di 2’or di marduga central di polis a ser notifica di un accident frontal cu hende herida banda di Hooiberg. 

E caminda banda di Well Well bay nort e accidente frontal a sosode entre un Nissan Sunny color cora A-34855 y un Suzuki Baleno Station Wagon A-21170. 

Parce cu e chofer di e Sunny lo a pega soño tras di stuur y hala riba su parti robez y dal frontal den e Baleno. E Sunny ni sikiera a laga marca di brake riba caminda indicando cu e chofer lo tabata na soño. 

Polis a pidi ambulans mesora y dos unidad cu paramedico a yega na e sitio. A pidi tambe pa un docter mirando cu e chofer di e Sunny no tabata duna señal di bida. Den e Baleno tabata tin tres persona di cual tur tres a keda levemente herida. 

Nan a ser hiba hospital pa un control medico. Na yegada di dokter John Croes el a constata morto di Lorenzio Leon naci na Aruba dia 27-10-1964 y ta biba na Mon Pos. 

Famia cu a yega na e sitio a reconoce e victima. A tuma e curpa den beslag pa asina haci autopsia riba e curpa y saca afor e causa exacto di e morto. 

E porta di chofer di e Sunny no tabata habri y bomberonan mester a bin cu ekipo di rescate pa habri esaki.. Polis di trafico a haci un investigacion mesora na e sitio pa haya mas claridad riba e motibo exacto di e accident.

Comments (0)