ORANJESTAD(AAN):Un bashamento di bala cu varios perforacion ta loke a keda atras den Dakota unda antes tabata Bouw Maatschappij. 

Polis a haya e prome yamadanan di un caso di tiramento banda di Club Havana. Ora cu polis a yega no a topa cu esnan cu a tira. Un rato despues polis a haya informacion cu tin tiramento den Dakota cerca di e cancha di basket. 

Polis tabata mesora na e sitio y ainda a mira un mandamento di baranca y otronan cu palo den man. Ora cu nan a mira polis esnan di gang di Dakota cu lo a tira, a purba core bay, pero polis a gara dos. 

Parce cu e pelea a cuminsa banda di Club Havana caminda algun amigo famia di otro a bin busca dos mucha muher hulandes. 

Ora cu nan a yega, e grupo di Dakota a cuminsa busca problema y bati riba nan auto. Aki a cuminsa pelea unda un di esnan den auto a keda herida cu cap na cabez. 

E problema no a caba aki pasobra esnan cu a bira victima a bay Dakota pa busca e grupo cu a agredi nan familiar. Ora cu nan a yega banda di e tereno habri den Druivenstraat nan a mira algo di esnan cu a agredi nan familiar. 

Mesora e rumannan C. conoci den e mundo di Kick Boxing a baha pa regla cuenta cu e gang di Dakota. Ora cu esnan di gang di Dakota a mira kico ta bin pa nan, a saca arma di candela y cuminsa basha bala. 

E tironan a perfora luz di e auto di rumannan C. y tambe porta di garashi di un cas den Guyabastraat. Polis a ser yama y tabata tey mesora. 

Esnan den gang di Dakota a core bay laga auto atras pero polis a logra detene dos di nan. No a haya arma, pero si a logra haya hulls di bala. 

Algun mucha muher cu tambe tabata eynan a ser poni na tera e momento ey door di polis y despues a listra nan tambe.
Nan a bin trece un hende na e pida tereno unda e gang di Dakota ta frecuenta y a haya nan mes den problema. 

Mal amigo por hinca bo den problema y te hasta nan por a bira victima di tironan cu a cay. Ademas di e dos detencionnan cu a cay di e militar Gumbs y tambe Bosnie a confisca auto cu a keda atras. 

Riba e foto por mira mas di tur loke a sosode unda por mira esnan deteni, hobennan na e sitio envolvi den e problema, perforacion di bala etc…..

Comments (0)