ORANJESTAD (AAN): Durante un entrevista, DIARIO a puntra director di APA si e ta sinti cu nan ta cla pa bisa cu e futuro di waf ta sigura. 

Segun Alfonso Boekhoudt, en berdad ta asina cu nan mester ta cla cu tur e compranan y regla e cambio di bestemming di tur e terenonan, na momento cu ta bay start cu e plan di desaroyo di Oranjestad. 

Pa tal motibo APA mester tabata diligente cu compra di e terenonan. APA no por a djis keda sinta warda, te ora cu Gobierno quizas por a pensa riba otro forma pa traspasa e terenonan aki pa APA. 

A dicidi mas bien pa APA cumpra e terenonan riba un termino cortico, pa integra esakinan den e plan di desaroyo, ora cu ta asina leu.
DIARIO a puntra Boekhoudt ki dia e ta kere cu tur cos ta bay cuminza, pa loke ta e desaroyo di Oranjestad. 

Segun directo di APA, te ainda ta trahando riba e master plan y esaki no ta cla y aproba ainda. Tin un proceso cu e tin cu cana door di dje, unda cu algun cambio mester worde haci tambe. 

Cualkier master plan cu APA tin, mester tin e flexibilidad, di permiti esun cu ta bay inverti den e proyecto, pa trece cierto cambionan den e master plan. 

Mester cumpli si cu seguridad. DIARIO a puntra Boekhoudt si tin hendenan interesa den desaroyo di waf banda di Royal Caribbean y el a bisa cu si, pero ainda no ta e momento pa acerca nan. 

Importante tambe ta pa percura pa e desaroyo di Barcadera ta cla, prome cu e traslado tuma lugar. E estudionan riba waf di Barcadera si ta cla caba. 

DIARIO a puntre director di APA si nos waf ta safe y el a bisa cu e waf ta hopi safe, pero toch den futuro e lo kier haci cierto cambionan.
E manera actual di percura pa seguridad di waf ta cu tin wayanan special pa impedi hende drenta waf, pero esaki no ta pas den e area turistico.

Comments (0)