|
 Cu e areglo cu autoridad penal a yega na dje, a base di su propio proposicion, pa no bay den apelacion contra decision di Huez den e casonan rond di e personanan cu tabata bo por bisa, e motibo di e cabay di campaña di 50 Miyon, a yega un fin na uno di e investigacionnan mas grandi di DIARIO.
Na e ocasion aki, cu exito, DIARIO por a asumi su responsabilidad periodistico na un pais, caminda e ley di orden mester worde restableci.
Awor ta di spera cu tur esnan cu tin na un forma of otro, responsabilidad pa percura pa e pais aki no cay den un dictadura completo cu transformacion di su base legal, tin e curashi pa sikiera awor duna di nan banda. Si esey no socede, tur victima di e Caso Fondo Desaroyo Nobo a sufri sin motibo. Henter e pais a worde hiba na un abismo, sin motibo y luz no ta cende na horizonte.
Pa por a realiza e investigacion, tabata tin aspectonan sumamente importante. Na prome lugar mester pone figura di Jossy Mansur central. Ora Jossy Mansur a worde confronta cu e puntonan central di e Caso Fondo Desaroyo Nobo e tabata tin den su man pa bisa cu mihor laga e caso pa loke e ta of encamina e proceso pa rementa un calumnia estatal, loke a nifica confronta e instancianan cu nunca den historia di Aruba, tabata necesario pa confronta den nan colectividad.
Jossy Mansur no solamente a permiti pa DIARIO a haci e investigacion di e Caso Fondo Nobo, cu na su terminacion lo demostra con largo e rabo cu e lo tin pa Aruba lo ta, pero a duna su aporte, guia y estimulo.
Pa por a kibra un mentira, un calumnia, cu a compaña y dicidi pa un pais durante siete aña, mester a determina: kico, con, kende. E pakico tabata conoci y si e caso aki no a worde rementa, e lo sigui pa topa cu proximo eleccion. Esencial tabata cu durante 7 aña, no menos cu 17 ciudadano, a worde persigui, desprestigia, kibra na tur forma cu por a kibra un hende, no pasobra algun di nan por a falsifica un oferta, pero pasobra a haci pueblo biba cu e creencia cu nan a horta 50 Miyon di pueblo. Dolor di hende a sirbi un causa politico: esey ta e caso Fondo Desaroyo Nobo.
Ora por a duna evidencia cu esnan cu a hacie ta hustamente esnan cu mester a percura pa un pais husto y honesto; esnan cu mester a sigura bienestar di tur ciudadano; esnan cu tabata tin funcionnan di e confianza mas grandi y esnan cu e poder mas grandi, a realiza pakico e tabata posibel pa crea e mentira y mantene siete aña largo.
Ora a yega na e nucleo, con a hacie, asco a drenta esnan cu a traha den e investigacion. Asco pa hendenan cu a hura cu nan ta traha na bienestar di nan pais cu ta paga nan tanto placa pa nan ocupa cu funcionnan cu ainda nan no kier bandona pa e pais aki por conoce un mañan nobo, tabata yena nos. Mas ainda pa e forma con enbez di realiza cu a cay riba nan pista y nan lo trompeca, ainda enbez di tin e grandeza di papia berdad nan a insisti te final den nan mentira of sosten di e mentira.
DIARIO semper a bisa cu su compromiso ta cu pueblo. Y cu e ciudadanonan aki e compromiso tabata. E confrontacion cu e poderosonan cu a alimenta e cabay di 50 Miyon, tabata pisa pero berdad a carga nos. Mester a splica pueblo leynan complica cu a worde mal usa y troci. Funcionamento di e pais, cu a worde ranca for di su fundeshi. Mester a destrona e poderosonan cu a mal usa nan funcion door di kita for di nan e titulonan honroso cu cual semper nan a cubri nan mes.
E investigacion a termina. Awe Aruba por huzga kende a gaña y kende a papia berdad. Kende tabata sincero y kende tabata mentiroso. Kende a traha pa Husticia y kende a mal usa husticia pa por a logra nan proposito.
Un investigacion pisa a conoce su final. Caso Fondo Desaroyo Nobo San Nicolas: un caso cu a basha hasta Constitucion abau, awe ta dal den cara di esnan cu a kere cu nan ta invencibel. Awe mester tabata epoca di victoria di un calumnia historico.
Husticia a vence y el a bira epoca di victoria di berdad, cu esnan cu ta biba di scuridad, di accionnan sushi hasta contra hende, no ta soporta! Awor ta na comunidad kico e ta haci, pasobra cada hende, cada pais ta cosecha loke e sembra of permiti worde sembra!
 |
