|
ORANJESTAD (AAN): Partido AVP ta realizando un analisis profundo relaciona cu e situacion den AZV. Benny Sevinger den conferencia di prensa e trece dilanti algun dato cu nan a constata te na e momentonan aki. Entre otro a bisa cu si ta mira casonan di AZV cu a subi den diferente parti tin cu constata cu esakinan atrobe ta decisionnan desastroso di minister Booshi Wever cu a conduci na e gastonan aki.
A bisa cu por ripara cu gastonan di AZV pa loke ta trata mandamento di pacient afo cu a subi cu casi 7.3 miyon Florin. Segun e raport di KPMG por constata cu ta practicamente e gastonan aki a subi door di problemanan di curazon. Na otro banda tin problemanan di wowo, cu docternan di wowo por atende na Aruba.
For di esaki por saca afo cu minister Wever a dicidi di boicotea e docternan, e cardiologonan na Aruba. Nan no mag haci cierto trabaonan mas y consecuentemente mayoria di e pacientnan mester bay tuma un tratamento afo. Esey ta conduci cu nan mester bay cu un otro persona, paga hotel, cuminda, y aki ta mira claramente cu gastonan ta subi cu 7.3 miyon Florin.
Mesun cos ta conta pa loke ta trata docternan di wowo. A bisa cu a bay den un pelea contra Dr. Wolter. Awe Dr. Wolter ta un experto na Europa y aki nos tin cu dicidi di manda hendenan afo, consecuentemente gastonan ta subi. Esaki ta decisionnan cu AVP kier denuncia y cu nan ta bisa cu Minister Wever tin cu carga responsabilidad tardi of tempran pa e decisionnan politico cu e mes ta bisa y cu ta gastonan innecesario cu e pueblo aki tin cu paga, a indica.
Otro decision politico a bin cu Centro Medico San Nicolas. A señala cu nan tur den Parlamento a vota pro pa un mocion unda cu ta bisa cu mester bin un centro medico, pero nan a bisa cu e centro medico aki mester ta leu for di politica.
Al contrario, a expresa, Minister Wever a tuma pa loke ta trata traha e centro medico aki, pero decisionnan politico a worde haci y ta worde haci dunando e momentonan aki ainda na e centro medico aki. E minister ta dicidi, kende y con a bira director y kende ta worde nombra y con e por pone hendenan traha eynan.
Consecuentemente, Minister Booshi Wever a pone pa loke tin di haber cu e gastonan di e centro medico aki, 7 miyon disponible, pero mas hende ta tuma den servicio, mas e gastonan di centro medico ta subi y esaki a bira mas di 11 miyon, a declara. Door di esaki, AZV tin cu pone tur aña 4.4 miyon Florin extra pa centro medico. Ken ta paga? Pueblo tin cu paga, Sevinger a manifesta.
E parlamentario a sigui bisa cu esaki ta algun di e puntonan cu nan por saca for di e raport di KPMG. Tin mas gastonan manera esun di hospital cu tin mas di 6 miyon, caminda por mira cu decision politico tambe a worde tuma eynan.
 |
