|
Skirbi pa Jenny Cratz .........Cu e funcionamento di e Secretario di Algemene Rekenkamer, e control di pueblo pa medio di su representantenan den Parlamento, ta tuma lugar manera e mester ta of ta basha abau.
Ora e funcionamento di Secretario di Algemene Rekenkamer ta contra interes di e pais, Parlamento tin e deber di tuma medida. Den e caso aki, mayoria den Parlamento hunto cu Rudy Lampe no por haci nada contra Emy, pasobra nan tabata uno den e motibo cu a hiba Aruba na e situacion desastroso cu e ta.
E rapport Laboratorio, un resumen di delito, ta un ehempel mescos cu e hecho cu Max a horta casi Mey Miyon for di caha di Pueblo na Departamento di Finanza y a sinta na cas te ora e por a bay cu pensiun mientras a duna e protegido di Gobierno, Gus Oduber un promocion y hacie Director di Propiedadnan Intelectual pasobra e no a denuncia su miembro di partido Max.
Pero den cifranan di Departamento di Finanza e ladronicia aki mester ta aparece y Algemene Rekenkamer cu ta ricibi tur copia di tur documento financiero, mester a topa cune. Asina por sigui cu cantidad di casonan cu awe tin Aruba den problema serio pa e motibo cu nan no a worde denuncia na Parlamento y na Pueblo directamente door di Algemene Rekenkamer.
Emy sa cu no ta Maiky so mester worde investiga den e ladronicia di Laboratorio. E sa cu ta e situacion cu a worde crea a permiti Maiky horta 10 Miyon y permiti tur loke a socede den Laboratorio, socede. A base di e rapport di CAD, cu ta controla Gobierno, mester a sali un rapport di Emy, cu ta splica Parlamento kico ta pasa den Laboratorio for di 2006 y e rapport di Emy mester a pone Gobierno directamente responsabel pa loke ta pasa den Laboratorio, caminda obviamente cambio di Gerencia mester a tuma luga y investigacion na Finanza mester a cuminza.
E forma con Banco Central a bende su edificio y muebles cu Gobierno pa Ministerio Publico, ta completamente contra Ley y ta otro caso cu Emy mester a entrega Parlamento. Asina por sigui cu fayonan di Emy, cu a condena su mes cu e carta cu el a manda pa Departamento di Finanza bisando cu nan “mal guia” na Ministronan a costa e pais Miyones ora su ruman a bay pidie conseho contra Departamento di Finanza. Pero ainda Emy no a manda bisa Parlamento cu algo no ta bon den Departamento di Finanza!
Emy den e casonan grandi aki, mester a bati alarma na Pueblo directamente despues di a manda rapport pa Parlamento y asina por a evita Miyones di Pueblo worde malgasta.
Ta Emy ta e prome persona como Secretario di Algemene Rekenkamer, pa tuma accion y convoca reunion di Algemene Rekenkamer cu ta aproba y firma e rapportnan cu Emy y su expertonan ta copila. Si awe Emy kier pasa manera avion den e rapportnan y pidi Parlamento aproba nan sin bay profundamente den nan, ta pasobra Emy y mayoria di Parlamento sa cu ta bay topa den e cifranan e motibo principal pa cual Aruba ta den un desastre financiero awe.
E culpabelnan ta Emy, cu no a controla, y e mayoria den Parlamento cu no por mishi cu Emy pasobra e tabata traha pa ehecuta plannan di nan partido pa kibra Gobierno anterior pa medio di e Caso Fondo Nobo. Den e caso aki, Emy no mester tabata testigo di Ministerio Publico, pero mester tabata consehero di Parlamento cu mester a atende e cifranan di Gobierno anterior y actual y ningun momento mester a laga e tarea aki na Comision di Berdad, cu no tin ningun base legal.
Esaki ta e motibo cu ni mayoria den Parlamento ni Rudy Lampe por haci loke situacion ta exigi nan haci awor, tene Emy responsabel pa no a guia Parlamento y Pueblo durante ultimo añanan cu e resultado cu Aruba ta na punto di cay for di baranca.
Mas bien e partido di e mayoria den Parlamento a beneficia di loke Emy a haci y a tene nan na mando, mientras Aruba tabata zink. Si mi ta gaña, mester lesa rapport di Banco Central bon. E instancia aki no por permiti su mes di no trece cierto puntonan dilanti den su relato anual, cu ta bisa bon cla cu e gastonan cu Gobierno mester baha ta e gastonan bau cual “family and friends” ta resorta.
Emy den un situacion sano mester responsabilisa su mes y bandona su funcion, pero e ta keda pasobra mayoria lo sostene, mescos cu el a sostene nan. Hasta por bisa cu e partido mas grandi den Parlamento y Rudy Lampe mester yama Emy tambe danki cu nan ta den Parlamento, aunke esey no tabata su trabau!
 |
