|
 ORANJESTAD (AAN): Diamars Director di KIA Emiliano Geerman durante huramentacion di 15 wardador di preso nobo.
El a bisa cu e ta hopi contento cu e 15 wardadornan nobo di preso.
 Segun Geerman, e lo desea pa nan haci nan carera na e Instituto Correctional, unda cu nan lo keda hopi aña. KIA a apunta algun mentor, kendenan bao di guia di Mayor Grovel y otro profesionalnan, lo guia e cuidadornan di preso durante 3 luna di stage, caminda cu despues di 3 luna KIA lo tin 15 cuidador di preso mas di bon calidad.
Geerman durante su discurso a dedica algun tempo pa e metanan di 2008-2010, di Instituto Coreccional Nacional. El a splica cu nan ta papiando cu e asina yama Dienst Justiciele Inrichting di Hulanda, pa yega na un acuerdo di cooperacion, pa profesionaliza e organizacion y su trahadornan.
Parti di dje ta curso y trainingnan na diferente nivel pa e trahadornan, como tambe protocolnan di integridad. Lo bin posibilidadnan pa e cuidadornan di preso bay riba un stage na Antillas of Hulanda tambe, unda cu tambe lo tin expertonan di Hulanda cu lo or bin Aruba pa yuda cu e plan nacional di seguridad.
Geerman a sigui bisa cu pa logra e metanan aki a corto y largo plazo, lo bay inverti hopi mas ainda den e trahadornan di KIA riba diferente nivel.
Entre otro pa mehora e calidad di trabao riba e afdeling-nan, lo bin cu roosternan alternativo, caminda lo bay traha durante e oranan druk, cu hendenan cu mas experiencia, kendenan lo yuda guia no solamente e 15 cuidadornan nobo di preso, pero tambe e otronan, pa mehora e calidad di trabao cu ta worde duna.
Lo purba tambe duna mas atencion na e aspecto social di e trahador, pues no solamente cu e ta pasa gran parti di su bida den e instituto.
Lo percura pa e no traha cada bez overtime, sin cu e tin tempo pa pasa cu su famia. Geerman a sigui bisa cu lo haci tur esfuerzo, pa prome cu fin di aña traha un opleidingscentrum pa e trahadornan di KIA. E mapa ta cla caba na D.O.W y e lo worde construi banda di e tereno di warda di polis na Balashi y ta worde financia pa FDA.
 |
