|
ORANJESTAD (AAN): For di Costa Rica a drenta informe, cu Mike Eman, lider di partido AVP, a worde invita pa ta un di e presentadornan na un conferencia organiza pa SASE cu a tuma lugar e aña aki na San Jose, Costa Rica. E conferencia, SASE 2008 tin como titulo "Flexibilidad Económico y Stabilidad Social den era di Globalización."
SASE, Society for the Advancement of Socio-Economics, ta un organizacion internacional y inter-diciplinario cu miembronan den 50 pais rond mundo. E disciplinanan academico representa den SASE ta inclui economia, sociologia, management, psicologia, ley, historia y filosofia.
Aña pasa den November, Fundacion Digna Laclé a tene un symposio titula "1’er Symposio riba comunitarismo na Aruba," den cua Aruba tabata tin e honor di tin Prof. Amitai Etzioni, cu ta den e lista di e top 100 pensadornan di mundo moderno, presente, cu por cierto ta un miembro honorario di SASE. E conferencia di SASE 2008 ta un plataforma pa avansa e conosimento y comparti experiencianan di desaroyonan economico over di un grupo grandi di disiplina.
Mike Eman a worde encurasha pa atende e conferencia aki pa dr. Amitai Etzioni y dr. Jose Perez-Adan. Debi na interes di Eman, conosimento y vision pa cu e topico di comunitarismo, e organizacion a bin tambe e sugerencia pa sr. Eman duna un presentacion durante di e conferencia aki. Su presentacion a worde duna diamars ultimo y a resulta un exito. Hopi di e participantenan na e conferenicia a reconose y reitera e importancia di e topico cu Mike Eman a trece padilanti. Segun dr.Jose Perez Adan, e idea cu sr. Eman a trece padilanti ta "hopi intresante y novedoso". Su presentacion a papia di gratitud como un componente basico y fundamental den un relacion comunitario genuino.
Segun sr. Eman, e tipo di conferencianan aki ta hopi importante, pasobra bo ta haya un grupo grandi di intelectualnan y pensadornan academico di diferente disiplina cu ta reuni cada tanto tempo y intercambia di ideanan ariba topiconan di desaroyo economico y social. Nan ta trece idea, experiencia y observacionan cu nan ta comparti cu otro pa asina informa participantenan y esnan cu nan por drenta den contacto cu ne ariba e ultimo desaroyonan y con pa mihor maneha nan.
Den caso di Aruba, particularmente segun sr. Eman, nos a pasa den un desaroyo economico acelera y intenso. Un y tur por tuma nota con progreso a trece cu ne cierto presionan social. Nos a mira con e desaroyo economico acelera aki a pone un stress ariba por ehempel fibranan social den nos comunidad, relacion den famia, den barionan y di ciudadanonan un cu otro. E tipo di conferencianan aki ta duna luz ariba con mihor reacciona ariba e situacion inespera cu desaroyo por trece cu ne. Ta posibel pa por, “tin desaroyo economico y na e mesun momento tambe un desaroyo social equilibra,” segun Mike Eman.
E vision di partido AVP pa Aruba, no ta un vision cu ta gara for di laira y cana pronkia cu promesanan atractivo, pero irrealistico. Un vision ta un proceso tambe cu semper mester adapta su mes. Specialmente si bo mira e acontesimentonan mundialmente.
Creaccion di un vision pa un pais ta un proceso largo y cu ta rekeri hopi input di hendenan tanto paden como pafor di partido, teniendo cuenta cu desaroyonan tanto local y internacional. Un parti integral di forma un vision, ta pa haya e experiencia y informacionnan cu e tipo di conferencianan aki ta ofrece.
Sr. Eman lo ta back diahuebs y nos ta sigur cu e lo duna mas informacion ariba su presentacion exitoso na Universidad di Costa Rica na San Jose.
 |
