|
ORANJESTAD (AAN): Pastor Jefferson a mustra, cu un par di luna pasa, casi tur paisnan Latino Americano a reuni na Nicaragua, pa nan traha un strategia pa ataca e crise mundial di hamble. Nan a propone proyectonan diferente, pa desaroya tecnologianan, pa e beneficio di tur paisnan cu a bin den acuerdo cu e iniciatiba di e “Cumbre Alimentos para la Vida”.
Nan kier elimina, completamente, e hamber den America Latina, y yuda otro nacionnan di mundo cu ta carente de alimento. E cumbre aki tabatin un cobertura radiofonica internacional y, aki na Aruba, mi tabata scucha pa medio di un emisora di Venezuela. Mi a sinti orguyoso di ta Latino Americano, pa e unidad filantropico cu nan ta buscando pa e miho di tur nacionnan, inclusive, di otro paisnan cu no ta Latino Americano.
Mi a lamenta, cu aki na Aruba nos ta bibando manera den un estado di coma, dilanti di un crisis mundial y profetico. Ningun hende sa, cual rumbo nos lo bay tuma. Kico nos ta haciendo, “por lo menos”, pa desaroya un bon, sincero y profundo amistad cu Brasil y otro paisnan di America Latina? Ora cu e crisis toca nos porta, di manera mas contundente, ken lo bay duna un man pa nos?
Mas cu 30 aña pasa, Brasil a inicia un politica di prevencion economico, pa limita e consumo di petroleo (ainda cu Brasil tabata produci petroleo y su derivadonan) y pa desaroya su industria agro-pecuaria. Algun iniciativa cu Brasil a tuma, manera e desaroyo di combustibel deriva di e caña di suco, e caretera Trans- Amazonica y tambe e campaña pa limitacion di autonan riba caminda, a bira un gran exito.
E gobierno brasilero a haci fuerte propaganda pa coleganan di trabao compartir su auto cu otro y a duna libertad pa cualkier persona recore otro na banda di caminda, compartiendo e gasto di gasoline. Te awe, hopi brasilero ta laga su auto den un estacionamento y ta sigui cu metro of cu busnan.
Den e campo agro-pecuario, e gobierno brasilero a crea un strategia de apoyo pa e campesino, den asistencia tecnico profesional gratis riba tur departamentonan rural activo y a haci reforma agrario, dunando tera pa tur campesino aumenta su produccion. Mi ta sigur cu Hulanda(Union Europeo tambe) y Brasil lo bay duna yudanza gratis, den e area aki, pa nos pais Aruba, si nos Aruba toca na porta pa pidi yudanza.
E transportacion publico, aki na Aruba, ta deficiente y desola. Nos trafico ta satura di auto, lo cual ta aumenta e consumo di combustible y dioxido di carbono. Ami ta kere cu ta na ora pa nos gobernacion construi un caretera na parte litoral-Noord di San Nicolas te na Bushiri, pasando cerca di Faro y di tur hotelnan, cu conexion pa camindanan cu ta mas pa den na Savaneta, Santa Cruz y Paradera). Esey lo bay ta un caminda di salbacion economico y social pa Aruba.
Hopi hende lo bay cu su auto of bicicleta te na parada di bus na San Nicolas, y otro paradanan, y lo sigui cu un bus cu lo bay casi no stop. Cu lo bay costa placa, ta verdad. Pero, cobrando un suma chikito di cada vehiculo, pronto, e gobierno lo bay recupera tur su inversion cu un grandi solucion pa e presente y futuro.
Ora cu Brasil a tuma e desafio di construi e caretera Trans-Amazonica, e proyecto a descentraliza e crecimento populacional, a haci e costo di transportacion mas barata y mas rapido, a proporciona un reforma agraria extraordinario, dunando hopi tera pa e campesinonan, etc.
Obviamente, un hende por bisa cu Brasil ta Brasil y cu Aruba ta Aruba. Esey ta berdad, pero, e futuro feliz di un pais ta depende di e alcanse di nos vision. Aruba mester di un Ministerio di Agricultura y Ecologia, cu un ministro tecnico y no meramente politico. Nos sistema fisico y economico di alimentacion, tambe mester di un reforma revolucionario, urgente, y mi tin un plan pa e tema aki tambe.
E cunukero James Ramos ta buscando tera pa amplia su produccion di verdura y fruta. Waw! Mi conoce e cunukero aki y mi sa cu e ta un hoben apasiona pa e tera. Cuanto cunukero mas tin na Aruba cu ta loco pa tin un poco mas di tera?
Mi no kier ataca ningun gobernante y ningun parlamentario. No! Mi kier pa e mensahe aki yega na conocimento di nan, di un manera constructivo. Nos mester, urgentemente, busca un estrategia (nopolitico y no partidario) pa un salida viable y eficaz pa scapa nos pais di e crisis mundial cu ta riba caminda di tur paisnan di mundo. Bendicion pa nos Aruba. Pastor Jefferson Nascimento ta di Iglesia M.C.A., Mision Reino di Dios.
 |
