|
 ORANJESTAD (AAN) – Nos redaccion a acerca sra. Suzy Kock, presidente Asociacion Gasoline Aruba (A.G.A) relaciona cu e aumento regular di prijs di gasoline apesar cu tin noticianan alentador e ultimo dianan aki, riba cierto reduccion di prijs y ademas a puntre tocante e demanda di parti di e consumidor, si el a keda mescos of a baha.
 Segun sra. Kock e benta a baha den tur gasoline station, locual tabata di spera ya cu e presupuesto den tur famia ta keda mescos, pues no ta bay asina cu pasobra prijs di combustible a subi automaticamente e consumidor ta bay gasta mas placa, pero nan ta wanta nan mes na locual nan por gasta.
Esaki ta loke e consumidor Arubano ta haciendo; esey kiermen cu si nan tabata pone 25 florin na gasoline prome, nan ta sigui pone e mesun 25 florin awor, aunke e problema cu ta surgi ta cu e consumidor no ta compronde cu pa e mesun placa aki, cu nan tabata gasta un, dos of tres luna pasa no ta yena nan tanki mescos cos cu e tabata prome, y e trahadornan ta haya hopi reclamo pa e motibo aki.
Sra. Kock a señala cu por ehemplo, si un hende ta coriendo un Sedan cuatro porta 6 cilinder, e capacidad di e tanki di gasoline ta 57 liter, pues si tuma 50 florin di gasoline e ta mas of menos 14 pa 15 liter. Kiermen, cu e suma aki nunca ta bay yena e tanki.
Cu enfasis, sra. Kock a reitera cu consumidornan ta reclamando hopi cu nan no ta haya loke nan a paga pe na gasoline siendo cu nan ta hayando esey, simplemente nan no ta pagando pa e cantidad cu normalmente nan ta yena.
 Hasta tin hende cu ta pone 10 florin y hopi cliente ta biniendo cu placa chikito, kiermen nan ta uza loke nan tin den nan man e momento ey. E dama a remarca cu ta hopi dificil pa deal cu e situacion aki. Tin clientenan cu ta drenta den e gasoline station y ora nan ta worde splica nan ta compronde, pero tin otronan su simplemente no kier acepta ni cuanto splicacion nan ta worde duna.
Sra. Kock a menciona cu por ripara riba caminda tambe cu despues di cierto ora atardi no tin asina hopi auto mas ta keiro.
El a comenta cu mesun efecto cu e costo di bida tin pa un stacion di gasoline, tin pa tur otro negoshi. Kiermen, un bez cu prijs di gasoline subi tur otro gastonan tambe ta aumenta pa tur negoshi mientras cu salarionan ta keda mescos, ya cu e ganashi pa e comerciante ta bira menos. Ademas, un comerciante alavez ta consumidor.
Sra. Kock tin un conseho pa e automobilistanan y esaki ta pa nan planifica unda nan ta bay, por ehemplo haci e diligencianan cu nan tin cu haci den adresnan cu ta keda den un mesun ruta, riba e mesun dia. Asina nan ta haci tur cos riba un linea sin cu mester core bay y bin constantemente. Esaki ta unico manera cu por spaar na gasoline: door di planifica.
 |
