|
Esun cu bisa cu calidad di bida na Aruba no a baha te un punto pio cu 1985 ora Lago a bay sea a worde paga pa gaña; ta ciego pa realidad pa un of otro motibo y sigur no ta mira e problema grandi cu e ta causa pa yega na un solucion pa Aruba.
E fayo cu esnan cu por papia, pero ta dicidi di cera nan boca of solamente ta habrie ora nan beneficio directo ta na peligro, ta haci cu e problemanan grandi na Aruba, no ta haya atencion. Esey ta haci instancianan manera Camara di Comercio, ATIA, sindicatonan y tur grupo cu mester bringa pa nan miembronan, directamente responsabel pa e abismo cu Aruba ta cay aden.
Liderazgo no ta tolera hunga kens. Lidernan di cada gremio tey pa lucha pa e interes di esnan cu a duna nan oportunidad pa haya un lugar importante den comunidad, bira invitadonan fiho na ocasionnan special y bira “niet zomaar iemand”. Na varios ocasion mi a mustra dede riba nan y lo mi sigui haci esaki te ora mi mira e cambio desea pasobra Aruba no por mas!
No ta tempo pa sector comercial exigi Gobierno sinta cu nan na mesa pa splica nan kico Gobierno ta haci cu placa di comunidad? Nan ta sigui spera te ora comercio mester depende solamente di esnan cu Gobierno ta favorece cu placa di pueblo; te ora comercio no por existi mas sin e placa di droga y criminalidad, cu lo ta e industrianan principal di Aruba pa esnan den desesperacion?
Ta tristo cu comerciantenan, cu a hinca nan placa den campaña y di cual politiconan ta depende pa nan partido por participa na eleccion, no ta uni y ta menaza di stop tur contribucion na partido si no bin un solucion pa e sector comercial di Aruba, di cual pan di trahadornan ta depende.
Ta tristo cu tanto comerciante, pa por probecha personalmente di e gastonan di mas di Gobierno na servicionan, cu Banco Central mes ta bisa ta e lugar caminda por spaar placa, ta mira nan probecho so y no di tur otro cu ta zink! E calidad di bida na Aruba a yega un punto insoportabel. Mayornan na e momentonan aki tin preocupacion grandi pa por manda nan yiunan school ora vakantie termina. Di unda placa mester bin pa un famia, cu tin tres yiu cu mester bay school? Di unda e yudanza ta bin?
Tur hende sa cu e cantidad di hende pober ta crece. Tur hende sa cu rekinan den supermercadonan ta bira bashi pasobra supermercadonan ta baha man na loke por bira perdida. Nan no por sigui subi nan prijsnan cu no ta depende di petroleo so. E ta worde determina pa un bida comercial pio cu tranca, pasobra un comerciante den problema ta ranca e otro bay cune. Perdida ta haci cu productonan cu por daña ta bira scars y asina ta bira mas costoso. No ta costo original di e producto so. Ta e hecho cu pa baha carga cada bez tin problema y productonan ta core riesgo di daña. Ta e falta di un bon maneho riba tur tereno pa e pais aki funciona manera debe ser.
Mi ta sigur cu si Aruba tabata negoshi personal di e actual gobernantenan, nan lo no a manehe manera nan ta goberna Aruba. Nan ta mucho sabi ora ta toca nan beneficio personal, pa bay dirigi nan negoshi propio manera nan ta dirigi Aruba. Gremionan sa esey. Tur instancia sa esey. Pero ta keda keto. No ta haci uso di e union di forza pa exigi un gobernacion manera mester ta pa e pais aki y denuncia loke ta causa di problemanan di Aruba.
Pakico ta na medionan di comunicacion, esnan cu no kier hunga ni carni ni pisca, so pa mustra riba e resultadonan di tanto corupcion gubernamental? Pakico gremionan no ta habri nan boca y bisa cu loke tin Aruba na ruina ta corupcion y ta exigi pa bay investiga unda nan placa a keda ora instancianan oficial hasta kier destrui e cifranan, cu ta evidencia di mal gobernacion.
Cuanto tempo mas Aruba por soporta e situacion actual? For di awor e no por mas. Pueblo ta den problema serio. Aruba mester dicidi kico e kier y mayoria cu bo papia cune ta bisabo: bon gobernacion! Pero con bay pa loke bo kier, si bo lidernan ta cera wowo y boca pa evita problema pa nan mes? Con Aruba por dicidi pa su mes, si esnan cu tin e forsa pa yude, enbez di usa e forsa di dependencia di politiconan na nan, ta bira mucha manda di gobernantenan cu sa masha bon cu Aruba ta zink, pasobra ta nan ta pone zink!
 |
