|
 ORANJESTAD (AAN): Dr. Jose Perez Adan ta un profesor di sociologia cu ta e autoridad ariba comunitarismo den e comunidad Latino Americano. Manera e mes ta bisa, dr. Amitai Etzioni, e pensador y sociologo responsabel pa e base di e idea comunitario ta su mentor. Dr. Perez Adan a dedica su bida profesional y academico na investigacion y promocion di comunitarismo den Latino America.
Comunitarismo ta propone solidaridad, cooperación y defensa político di e comunidadnan intermedio, manera por ehempel famia y iglesianan. E idea ta cu gobierno no mester fungi manera un instancia todo-poderoso of monopolistico. E no mester incorpora tur e trabaonan di e comunidadnan intermedio pa su mes.
Gobierno mester ta un facilitador pa e comunidadnan aki den nos sociedad, pasobra nan por haci e trabao di un manera mas eficiente y dedica cu un aparato gubernamental cu por bira un fuente di burocracia ilimita. Gobierno mester administra, subsidia y maneha e comunidad. Unda e comunidad ta faya den su trabao, claramente e mester interveni y dreche. E ideanan di comunitarismo no ta nobo na Aruba. Aña pasa Aruba tabata tin bishita di dr. Amitai Etzioni durante un symposium organiza pa Fundacion Digna Lacle.
Ariba e pregunta si den Latino America e idea di comunitarismo a pega, dr. Perez-Adan tin un opinion mixto, pero positivo. Segun e ta splica cu comunitarismo no a desaroyo na Latino America cu e mesun efectividad cu el a desaroya na paisnan mas avansa comunitariamente manera Merca y paisnan Europeo.
E problema na Latino America ta cu e burocracia ta asina grandi den e gobiernonan cu e introduccion ta tuma mas tempo. Pero e ta masha optimista mes ariba comunitarismo den Latino America. Na Merca y Europa tabata tin hopi politiconan manera Tony Blair, Jan Peter Blakenende, William Clinton, Angela Merkel cu a introduci y reenforza e idea di comunitarismo den nan paisnan, haciendo asina e structura gubernamental di e paisnan aki solido. Na Latino America esaki tambe lo worde logra, pero tin di haci caminda pa minimalisa e burocracia y structura monopolistico di e gobiernonan.
Ariba e pregunta di cu si e ideanan comunitario cu Hugo Chavez ta papiando di dje ta loke comunitarismo ta, e contesta di dr. Jose Perez Adan ta uno categorico. Segun dr. Perez Adan, loke presidente Hugo chavez ta propone ta un expansion di socialismo y socialismo estatal, cu ta un idea totalmente contrario na e comunitarismo basa ariba ideanan di dr. Amitai Etzioni cu ta esun cu a worde implementa den paisnan manera Merca, Hulanda, Mexico, Chile, Alemania y Reino Unido entre otro.
Aunke cu tin hende (sostenedornan di Chavez) ta pretende cu e tin ingredientenan di comunitarismo, segun Perez Adan, esaki no ta berdad. Durante di SASE 2008, conferencia organiza pa “The Society for the Advancement of Socio-economics”, tabata tin un panel cu a trata e topico aki. Consensus general tabata ta cu e idea comunitario di Chavez no ta comunitarismo.
Ariba e pregunta pa e por elabora ariba e presentacion di Mike Eman durante di e conferencia di “The Society for the Advancement of socio Economics” na San Juan Costa Rica, su contesta tabata ta uno di hopi satisfaccion. Segun dr. Perez Adan, e tambe ta trahando ariba topiconan similar den comunitarismo. E topico cu Mike Eman a presenta, a trata di e relacion entre gratitud y e ideal comunitario, ta algo hopi intresante y importante. Pasobra segun dr. Perez Adan, gratitud ta un ingrediente fundamental y basico pa comunitarismo por worde implementa y mantene exitosamente.
Ariba e pregunta si dr. Jose Perez Adan lo bishita Aruba, su contesta tabata hopi positivo. Segun su mesun palabranan e lo ta honra pa bishita Aruba, mirando cu su mentor, Dr. Etzioni, a bishita Aruba aña pasa pa e 1’er Symposio riba Comunitarismo na Aruba. Segun dr. Perez Adan e lo ta un honor pa bishita Aruba y duna su contribucion na e dialogo di comunitarismo na Aruba y el a haya un invitacion for di Mike Eman pa esaki caba.
Nos ta spera di cu e aña aki nos por ricibi dr. Jose Perez Adan durante di e “Di 2 Symposio riba Comunitarismo na Aruba” cu lo worde teni e aña aki ainda.
 |
