|
Ora mi saca spada, mi ta sake pa un principio of pa un causa cu ta sirbi e nacion. Mi ta bringa abiertamente y no ta sconde mi mes tras di ningun mascara ni disfraz, pasobra esey ta simbolonan di cobardenan, cu mi ta repudia.
Cu DIARIO ta haci un grupo di hende dolor, mi por comprende. Nos trabau no ta mira prome cuanto placa nos por perde of gana y e ora mira si ta cumbini pa nos skirbi loke ta na interes di pueblo. Pesey nos ta haci dolor na esnan, cu no tin bista pa e dolor di e totalidad di un comunidad y no tin ningun respet pa e leynan basico cu ta exigi pa tur cu ta ocupa un funcion publico, tene bienestar general na bista y no abusa di poder, cu ta pa un rato.
Mi tin un duele profundo di hende, cu mester gara na dobel cara pa nan por keda ni carni ni pisca y asina por saca beneficio pa nan mes for di e situacion imperdonable cu demasiado hende ta biba aden na Aruba. Nan ta bende nan identidad pasobra nan ta loke circumstancianan di momento ta mas beneficioso pa nan mes pa ta. Esaki sigur ta e caso cu cierto Curazoleñonan, cu durante ultimo aña a haya oportunidad pa bin ocupa puestonan na Aruba, pero mester cera nan boca pa loke nan ta haci cu Arubianonan.
Mas tristo ta, cu pa tene nan amigonan politico cu a duna nan e chens pa bin trapa riba pan di Arubianonan, contento nan ta bay bende loke nan ta haya placa pe pa bende na Curacao, caminda nan ta Curazoleño. Come di dos tayo, nan ta bisa na Hulandes.
Con un Curazoleño, cu a keda na trabau mientras cantidad di Arubianonan contra tur regla y ley a worde poni riba caya cu un pensiun miserabel di cien of dos cien Florin, tin e moral pa critica loke mi, na nomber di esnan cu el a yuda tira riba caya, ta protesta contra dje? Mas ainda si su esposa tambe a haya oportunidad di trabau na e mes lugar cu no tabata tin placa pa paga hendenan, cu despues di trabau cu a exigi sacrificio grandi a haya un schop y di un dia pa otro a cay den miseria?
Bo ta loke bo ta, unda parti di mundo cu bo ta biba. Si bo ta un cobarde, bo ta keda un cobarde unda parti mundo cu bo bay. Ta asina bo ta. Bo no por otro, pasobra bo no por cambia bo mes, mas ainda si bo laga nan hinca bo pia den cement pa bo no cana manera bo kier.
Si bo ta un probechador, bo ta keda un probechador unda parti mundo cu bo ta. Naturalmente bo ta haya cierto amigonan den e circulonan cu ta cumpra amigo, pero mi no ta interesa mes den e tiponan di amigo aki pasobra como hende mi no ta articulo pa cumpra ni bende. Ta pasobra mi conoce mi balor di hende, mi ta reconoce e mes balor den tur otro y ta lanta para contra un sistema cu ta podera su mes di e pais aki, cu ta exigi hende bende nan concenshi, hunga santo, mientras nan ta trapa riba e derechonan mas sagrado di tur ciudadano di e pais.
Si DIARIO ta matutino di pueblo di Aruba ta pasobra DIARIO a sa di lucha hunto cu e pueblo na e momentonan mas pisa di su historia. Hende di tur color politico sa cu nan por acercami como hende y expresa nan problema, sin miedo cu mi ta bay kima nan, manera esnan cu ta bende nan prohimo si ta necesario pa nan propio beneficio ta haci.
DIARIO a compaña Aruba den su momento dramatico cu el a bira pais cu mester a para riba su pia. DIARIO mester a duna aliento na Arubianonan cu a mira futuro cay for di nan man y a sinta yora riba caya ora Lago a bay. Hunto nos a yora, comparti, edifica, traha sin puntra otro, ki color politico bo tin. Nos tabata hende, un nacion luchando pa un sobrevivencia, cu awe nos mester bolbe lucha pe y cu mas fervor pasobra nos mester puntra nos mes si semper bay nos tin otro chens pa bolbe scapa loke ta bay perdi.
Cu DIARIO no ta hiba luchanan deshonesto, sin base, sin motibo, tempo ta sigui demostra y nos ta haya razon ora berdad y husticia prevalece. Nos ta sigui cana y sigui traha pa un Pueblo cu sa ken ta ken y kico ta kico. Cobardenan ta worde poni un banda, pa Aruba drenta un mañan di bienestar, husticia, derecho (y no fabor corumpi) pa tur hende! Bay skirbi awor na Curacao y na otro paisnan caminda mi a biba, kico mi a skirbi. Nan lo no keda sorprendi, pasobra tur caminda cu mi a biba, mi tabata y ta loke mi ta y no tabata tin placa pa cera mi boca!
 |
