|
Aruba ta den boca di Reino atrobe, cu mester comprende, cu a menos cu e kier haya su mes envolvi den asuntonan sumamente serio awor mester tuma pasonan dirigi pa garantisa loke e ta responsabel pe na Aruba. Na momento cu Servicio di Seguridad di Hulanda ta vigila desaroyo den haf, Reino mester comprende con serio e situacion na Aruba a bira y cu Reino mester haci algo.
Haf di Aruba ta proteccion di e pais y no mercancia. Tempo e caso di Namdar a cuminza, DIARIO a acerca Hulanda y a pone na haltura kico ta pasa. A worde priminti cu ta sigui e desaroyonan y awe e caso Namdar a muri den braza di Ley di Contabilidad den Parlamento, caminda mayoria cu ta di Gobierno, lo no bay haci nada contra gobernantenan cu nan no ta vigila manera ta trabau di Parlamento, pero ta bisa nan kico pa haci of no haci.
Con leu mas Aruba mester yega? Na Merca mester pidi intervencion di autoridad Mericano, cu a detene Maiky cu a laba placa, cu a permitie horta na Laboratorio. Autoridad Mericano sa di e caso Namdar tambe y sa con autoridad penal di Aruba a atende cu e caso. Aunke e solo hecho cu Namdar a skirbi e carta ta haci cu na Merca el a comete un hecho castigabel, esnan cu conoce e sistema di persecucion Mericano sa, cu Merca no ta bay actua si na e pais caminda e interes pa soluciona e caso ta mas grandi, nada ta worde haci.
Aruba awor ta worde vigila pa Seguridad Nacional di Reino pasobra atrobe no ta interes nacional ta worde mira, pero loke por saca for di haf, cu ta parce di a bira un mercancia pa Gobierno, mescos cu a socede cu e propio suelo di Aruba cu a worde bendi na proyectonan.
Nel Oduber a bay bende waf cu China, cu lo a bin cu cantidad di negoshi, cu a keda pega na mitar caminda aparentemente. A bay India.
A negocia cu Namdar/Royal Caribbean. Mientrastanto e loke haf tabata produci pa Aruba mes a bay y esey a haci cu tanto negoshi Arubano ta pasa den problema serio. Carnival Cruises cu tabata na interes di Aruba, no ta bini mas. Gobierno no a move un dede pa rescata e loke tabata percura pa tanto famia come.
Kico ta haci cu Aruba? Esey ta e pregunta grandi cu mester worde puntra. Kico Aruba ta bay haci cu un proyecto di haf, cu ta bay concentra su mes atrobe riba negoshi di shopping mall grandi, mara na un proyecto cu pa años tabata na disputa? Con bienestar di pueblo ta worde sirbi? Esey ta e pregunta mas grandi.
Haf di tur pais ta algo cu ta worde cuida. E haf mester bringa proteccion na un pais, manera Gobierno sa masha bon. E ta alma di economia di un pais, cu ta depende di importacion y di turismo, di cual hopi ta bin cu crucero y riba cual parti di economia ta depende.
Si mira cuanto vuelta tabata tin riba waf durante ultimo añanan, por conclui cu algo pisa ta socede. Si awor e interesnan dividi riba waf ta uni, ta resulta cu ta pa un interes comun cu enbez di worde aplaudi pa Hulanda ta pone Seguridad Nacional di Hulanda den accion.
Ta di spera cu Hulanda realiza kico ta pasa na Aruba awor. Cu esnan cu ta sclama pa situacion normaliza na Aruba no ta hacie pa politica, pero pa scapa un pais cu no por sigui zink. Ta di spera cu e solo hecho cu Hulanda mes por haya su mes den problema, ta suficiente inspiracion pa politiconan Hulandes cu manera demasiado bez DIARIO a trece dilanti, no ta papia palabra cla cu Gobierno y no ta duna pueblo e indicacion cu algo lo socede pa restablece e orden na e pais.
Aruba no por cu mas problema. Ta dificil acepta cu gobernantenan, pa no papia mes di e mayoria den Parlamento cu aparentemente ta mira nan partido y no ta mira e pueblo cu nan ta representa, no por comprende cu Aruba a yega na un punto, cu e mester di solucion pa tur e problemanan cu mal gobernacion a crea. Sin duda Aruba a alcanza e punto mas abau di su existencia riba tur tereno. Esun cu no kier mira esaki, no kier mire!
 |
