|
Tur hende sa cu Maiky a bay cera pasobra el a horta 10 Miyon di Laboratorio. Tur e hendenan cu a probecha di e ladronicia aki, si no a bira conoci. Aparentemente Landsrecherche a drenta Finanza, pero tempo mester demostra cuanto copi di cofi ta bebe pa repasa un documento hunto pasobra con cu mire, ta loke Landsrecherche kier e ta bay cune y ta loke Finanza ke e ta duna.
Cu informacion corecto cu a worde duna na Landsrecherche den e caso Fondo a worde trata manera no ta prueba palpabel pa stop di acusa loke no ta husto pa acusa, y cu esnan cu mester a bay nan tras pa sa cuanto cheque nan a percura pa haya firma a keda sano y salvo, no ta duna nos ningun garantia cu entrada di Landsrecherche na Finanza ta un intento pa den termino corto soluciona e delitonan cometi contra Aruba. Ta lastima cu mester bisa esey, pero experencia ta mustra cu ta asina ta.
Na cualkier pais e Rapport Laboratorio lo a pone tur ala di autoridad na careda hunto cu e instancianan imparcial cu mester controla e pais. Na Aruba, despues cu a tene scondi, ainda no ta atende manera mester ta. Te ainda nos no a mira un rapport di Emy cu ta splica nos e parti mas interesante di e rapport. Cual compania di seguridad a cobra mas cu su oferta tabata y sin contract? Emy mester papia, pasobra nos no por kere cu durante tur e añanan cu e rapport aki a celebra “cumpleaños” nunca a bay investiga no solamente un delito, pero un abuso di placa di pueblo.
Nos kier sa ta cual compania a probecha di esaki, pa un motibo masha simpel, Emy. Laga nos yuda bo pa bo no kibra bo pober cabez di mas. Emy mira den bo papelnan si ningun caminda bo por topa cu nomber di Bruce. No Bruce Lee di e cinenan di karate, pero Bruce di Aruba. Mira si Bruce aki no por a bira doño di un compania di seguridad, cu tabata tin otro doño prome.
Bo por check cu e Bruce aki kende a “bende” e compania, cu a worde poni na tur departamento di Gobierno (talbez a tene un paar afo) cu ta relaciona cu cuido medico. Lo bo por haya bo cu un panorama asina colorido, cu e ta duna bo gusto di subi cero pa mira con bunita e ta regla.
Kere nos, Emy aki tin trabau pa traha of miho bisa aki tabata tin trabau pa bo traha, pasobra ta for di 2006 e caso aki a worde denuncia door di Centrale Accountantsdienst pero el a desaparece. Bo a ricibi un copia y nos no sa si e copia di bo tabata skirbi cu inkt, cu ta desaparece despues di tempo.
Emy ta increibel cu un persona, un Docterandus den Bedrijfskunde, no a skirbi un thesis completo riba Laboratorio. No ta berdad cu den e laboratorio ta hopi cos a pasa? Nos por comprende cu bo no ta contento cu nos y pesey kier tene nos curioso. Kita nos soño pasobra meymey di anochi nos ta spierta ora nos corda cuanto placa a bay pa Overtime den laboratorio. Mas cu mitar di salarionan, Emy! Bo no ta haya cu nan mester a pone mas hende na trabau?
Pero loke bo mester splica nos ta, Emy, cual ta e compania di seguridad cu a cobra di mas placa sin contract. Nos kier papia cu e compania aki. Nos kier sa kico bo mester haci pa bo haya chens di cobra mas cu bo oferta ta bisa, y sin contract. Loke nos kier sa di bo ta tambe Emy, con e hendenan di Finanza a paga e compania aki sin cu tabata tin contract pa bisa nan kico paga e compania. Bo sa kico esaki ta nifica Emy? Cu e doño di e compania por a ricibi tanto placa, cu hasta e por a cumpra yate loke ta sumamente peligroso, pasobra Booshi por bisa kico ta nifica ora yate cuminza zink cu bo riba lama.
Awor cu nos ta skirbi di Booshi algo ta pasa den nos cabez. Bo a puntra Booshi, como Ministro di Salud Publico si e conoce Bruce? Bo no sa nunca, Emy. Por resulta cu Bruce tambe tin yate y cu sin cu pober Booshi mes tabata sa, e tabata nabega banda di Maiky,cu tabata tin dos yate y banda di Bruce cu tabata cobra di mas sin contract.
Emy laga nos sa kende ta Bruce. Traha bo rapport Emy. Bo popularidad lo sigui crece y kere nos cu e ta hopi halto. Hasta tin hende ta pidi nos publica bo portret. Pero esey nos ta haci dia nos haya bo rapport kende tabata e doño di e compania di seguridad, cu a cobra mas cu su oferta y sin contract!
Bay dal un vuelta banda di Seroe Colorado pa bo mente fresca y bo haya inspiracion con bo por drenta den contacto cu Bruce y splica nos pakico ainda bo no a raporta nada di e caso Laboratorio!
 |
