|
 Nan tabata keto. Demasiado keto. No por tabata solamente pasobra nan a perde nan cabay di campaña di 50 Miyon. Algo mucho mas serio mester tabata socede. DIARIO a bin descubri e gran berdad, cu awor aki tin hasta Reino asina loco, cu Seguridad Nacional di Hulanda mes tin bista dirigi riba nan!
Ta trata di un asunto sumamente serio y un abuso total y rotundo contra pueblo. Cu nunca e intencion por tabata bon, ta bin dilanti den e hecho cu e informacion corecto no a worde duna na pueblo, cu no tabata sa cu e mester paga sumanan enorme cu e no tin pa asina por realiza un proyecto di haf di 500 Miyon cu lo regala nan 25 Miyon. Si tabata e intencion pa e 25 Miyon aki bay pa pueblo, Nel sigur lo tabata e prome pa grita cu el a logra 25 Miyon pa pueblo.
Awor por comprende pakico Hulanda no kier entrega Aruba e placa di Plantation Bay, aunke Hulanda tabata tin e deber di laga pueblo di Aruba sa kico ta pasa y actua di biaha.
Si un union Hendrik, Nel, Eddie y Nilo tabata parce algo cu nunca Aruba lo a mira, awor Aruba ta mire. Nel y Eddie no mester ranca siboyo mas pa mira cual compania ta haya haf: esun di Nel of esun di Eddie. Tur Nilo su pica den nombramento na Servicio di Belasting a keda pordona. Awor por comprende pakico Nel mester a menaza e pais di cual e ta Ministro Presidente cu agresion ora Hendrik a haya su mes den e caso cu e agente policial y nan a detene!
Pakico awor Nel no ta lanta para y grita 25 Miyon? Pakico awor si Emy no ta na careda pa adverti Parlamento cu loke a pasa ta completamente contra Ley? Unda departamento huridico a keda?
Di e neishi di MEP di Finanza no ta papia mes, pasobra esey for di tempo cu a “purifike” y a logra saca practicamente tur hende di otro partido na un posicion clave pa pone hendenan di Nilo, ta loke Nilo bisa ta socede. Nan a percura pa e caso Laboratorio y awor nan ta bay paga un compania Hulandes,contra tur regla, un suma di entre 750 Mil y 800 Mil Florin pa asina traha un rapport cu ta haci posibel pa otro aña djis prome cu eleccion, por cuminza cu e proyecto di 500 Mil Florin!
Nos por mira Nel nos dilanti otro aña, segun nan plannan cu a keda descubri. Na careda for di Colombia, caminda el a pone un tubo den suelo manera Rudy Croes a pone polis drumi, e lo yega pa anuncia su logro cu gas lo pasa bau lama pa yega Aruba. Ora tubo di gas rementa, ta den man di otro e ta rementa.
Despues e ta pone prome piedra pa e proyecto di 500 Miyon di haf, awor cu el a dicidi di cambia diripiente di Royal Caribbean pa compania Hulandes. Con pueblo por sa cu tras di e 500 Miyon tin 25 Miyon? Pakico y pa kende e 25 Miyon lo a bay?
Abuso ta cu e asunto aki ta contra Ley pero tog e neishi di MEP Finanza a bay di acuerdo pa paga, aunke nan mes ta mustra cu ta un forma special mester busca pa ranca e suma aki for di pueblo pa duna e compania Hulandes cu lo bay traha e rapport.
Tin rapport traha. Un bon rapport pero mester di un rapport cu ta percura pa e plannan ta manera ta cumbini e compania Spaño, cu a keda riba lista di espera y awe a gana e bataya cu su proyecto di 500 Miyon cu 25 Miyon pa esun cu realiza e proyecto.
Un abuso grandi y total ta worde haci di Aruba, mientras e mes Nilo ta kita placa for di tur departamento pasobra mester a paga indexering. No ta bisa si cu, sin cu a sondea mercado pa mira si tin otro pa haci e trabau, a duna e compania Hulandes e encargo pa traha e rapport, loke ta completamente contra Ley.
Mientras autoridad Hulandes ta vigila e asunto aki, mester cuminza actua. No por permiti pueblo saca un cent mas pa 25 Miyon bay resulta riba un of otro cuenta bancario.
Cu ki cara Nel ta enfrenta pueblo? Con e ta bay bisa pueblo cu el a tende di 25 Miyon si permiti e proyecto di 500 Miyon? Kico e ta bay gaña pueblo awor? Cu a persigui Gobierno anterior, pasobra Gobierno anterior tabata asina bobo cu e no tabata sa con laga pueblo paga pa 25 Miyon por haya destinacion, manera ta socede awor? Husticia mester haci su mes na Aruba. Ya e decision di Nilo, Eddie y Nel ta un delito y mester actua awor!
 |
