|
Reacccionnan cu mi a hanja di lesadornan di Diario ta varia y aunke mayoria ta sostene y encurasha mi tin algun cu a alerta mi pa mi bai cu mas cuatela. Manera un conocir di mi (cu probablemente ta vota MEP) a bisa: “Bo ta bai mucho duro contra di Gobierno”.
Sin embargo ningun momento e a bisa mi cu loque mi a trece den publicidad ta incorecto loque pa mi ta bon. Ora cu mi ta papia di criminalnan den Gobierno, e “untouchables nan”, cu ta atraca caha di Pueblo systematicamente, tur hende sa kende nan ta. Loque no ta comprendible ta e golos cu nan ta, pasobra di berdad nan no tin cuero di cara corda sentido di berguenza.
Ora cu bo mira e desicionnan cu e Gobierno aki ta tuma, semper tin un supuesto intencion noble tras di nan. Pero ora cu bo analiza e manera cu e decision a worde tuma sin tene na cuenta reglanan di gobernacion drechi bo ta cuminsa duda den e supuesto nobleza. Peor ainda: ora cu bo ripara cu semper tin un amigo of famia di nan ta envolvi cu ta probecha di e decision bo ta yega rapidamente na e conclusion cu atrobe ta trata di e politica di “Friends & Family”. Parse cu e hendenan aki ta asina corupto cu nada pero nada e absoluto nan por haci sin cu un di nan ta saca probecho material. Aparentremente no ta mira kico e proyecto realmente ta ensera sino kende ta bai realiza e proyecto.
Esey ta e manera cu Mafia ta opera! Den mafia claramente nan ta papia di “family”cu ta consisti di miembronan no necesariamente famia di sanger sino di negoshi. Lealtad na e “family” ta ensera obediencia ciego na e “godfathet” cu ta e cabez di e famia. Obedece “Il Capo”, y e leynan segun cual e familla ta opera ta garantiza bo un futuro financiero pero na momento cu bo ta laga bo conseshi guia bo, bo ta bira obheto di persecusion.
Mira con proyectonan di e ultimo siete anjanan a mira luz di dia y semper lo bo hanja un nomber di un miembro di “friends & Family” envolvi. Destaho publico a bira un cos di pasado pasobra semper nan ta usa urgencia como excusa pa realiza e proyecto mas rapido posibel aunke cu e lo costa Pueblo di Aruba un dineral extra pasobra bienestar financiero di “Friends & Family” ta bai prome cu bienstar general di nos pais. Mira con e maneho di e problematica di adiccion a beneficia “friends & family” cu puestonan halto den e departamento y contractnan lucrativo pa donjonan di edificionan manera Hotel Central.
Mira con edificionan den centro di Playa ta worde destrui y con bergonzoso e bista aki ta pa henter nos pueblo. Comerciantenan di Playa ta worde perhudica pasobra clientenan ta worde molestia pero esaki no ta inspira ningun sorto di urgencia pa adapta e maneho y ya ta bai bira 8 anja di gobernacion sin cu tin un luz na horizonte cu ta indica alivio corda solucion.
E proyecto di dump despues di sieta anja di gobernacion ta indica un fracaso total despues cu ya millones a worde gasta y e ministro ta exhonera e compania di paga multa. Bo ta puntra bo mes : “bon, ta kende ta pagando su salario?” Pasobra ya bo no tin sigur cu e ta cuida interes di pais Aruba of interes di e compania Boulden & Lawson cu ta worde representa pa e abogado millonario mr. Hendrik Croes.
E proyecto di polisnan drumi ta aparenta di ta na beneficio general y especialmente ta pa prothega muchanan di school contra di chofernan iresponsable. Pero ya caba nos a tende nomber di un miembro di friends & family y cu e calidad di e polisnan aki ta hopi inferior pasobra school no a habri mes ainda pero ya algun di e polisnan aki a bira difunto.
Awor ta resulta cu cada un di e polisnan morto aki a costa Pueblo di Aruba 800 cien florin cu ta atrobe un atraco ariba caha di Pueblo pasobra atrobe a paga prijs demasiado halto pa un producto of servicio di calidad inferior. Nos no por haci nada te cu proximo eleccion y mester “para wak” con e Mafia Politico di Friends & family” ta teroriza nos pais.
 |
