|
Na varios ocasion ta worde bisa cu ta pueblo di Aruba mes a dicidi pa loke ta pasa na Aruba actualmente. Na un pais cu un sistema diferente di eleccion, esey lo ta berdad. Na Aruba no. Si haci un conteo di voto, por mira cu e Gobierno na mando ta un Gobierno cu no a haya e mayoria di voto den eleccion y casi no a alcanza e asiento cu e tabata tin mester pa por a forma Gobierno.
Esaki ta nifica, cu e Gobierno actual den eleccion no a goza di confianza di mayoria di pueblo. E ta algo masha importante pasobra na 2005, tabata tin diferente situacion cu a haci e eleccion diferente for di otro eleccionnan.
MEP ya tabata na poder y por a practica su maneho di costumber di partidismo politico. Esey ta worde confirma pa rapportnan cu awor ta mira luz y ta indica con basta hende di MEP por ehempel a worde poni na trabau, a cobra overtime, por ehempel. No ta politica ta hunga aki, pero ta loke rapportnan ta mustra, ta trece dilanti. Durante 2005, no solamente MEP den Gobierno tabata tin oportunidad di usa Gobierno pa haya voto, pero ademas a tene un campaña cu segun tur hende mester a costa hopi Miyon. Hopi ta worde papia te awor di e campaña di Marisol, por ehempel.
Banda di esey, tabata tin algo special pa MEP por a haya voto cune. Na 2005, Caso Fondo Nobo, e cabay di bataya politico di MEP pa destrui su enemigonan politico, a bira caso penal. Esey ta haci cu si mayoria di pueblo tabata di acuerdo cu loke MEP tabata haci, MEP lo mester a haya un mayoria absoluto, loke no tabata e caso.
Ni cu e campaña sushi di 50 Miyon, cu tanto MEP como Ministerio Publico cu a haci cu na 2005 no solamente Gobierno a worde usa pa partido, por a haci cu e mayoria di Aruba a vota pa MEP. Esaki por tabata motibo cu MEP, sabiendo cu e lo no haya mayoria absoluto di votonan y Rudy Lampe a kibra cu otro? Mi no sa. Pero mas y mas Rudy Lampe ta duna indicacion cu e ta cu cierto ala di MEP y personalmente mi ta mire como un banki di reserva pa den caso cu MEP no a haya e mayoria di asiento segun e sistema di restzetel, e por a yuda forma e Gobierno atrayendo un grupo religioso, cu awe ta realiza kico nan a haci.
E pregunta grandi ta keda si no ta tempo pa nos sistema electoral worde cambia. Mi a trece esaki na hopi ocasion y ta sigui para ariba. Pasobra aunke MEP no a haya e prueba di confianza di Aruba den e cantidad di votonan cu el a haya, e sistema electoral a permiti pa e keda na mando, cu tur e resultadonan cu esaki tin pa Aruba awe.
Si otro Gobierno, di cualkier asignatura a sinta, pa cuminza e hendenan cu MEP a pone den funcionnan clave pa e por haci y deshaci contra Ley, lo no tey awe pa sigui sostene loke ta contra Ley. Mi ta bolbe pa Emy cu sigur lo a worde reemplaza pa e forma cu el a permiti MEP goberna sin bon vigilancia. Theresa lo por a pusha Ministerio Publico den e abismo cu el a cay? Tanto proyecto cu mester a worde realiza, lo a worde realiza? Awe haf lo por ta mercancia internacional caminda 500 Miyon cu 25 Miyon Dollar scondi, lo ta worde vigila door di Hulanda? Awe Aruba lo ta paga BBO?
Si otro Gobierno a sinta, nan lo no a drenta Laboratorio y pone fin na loke tabata pasa? Pasobra MEP a keda den Gobierno, henter su aparato a keda, tur abuso di placa di pueblo a keda scondi y por a sigui haci loke tabata haci, contra decision di pueblo, cu no a duna MEP mayoria di voto den un eleccion cu MEP tabata tin tur cos na su ventaha, hasta ayudo di un caso penal cu el a crea contra su contrincantenan politico.
E situacion caotico na Aruba ta stroba hende mira hopi berdad. Esey ta loke ta pasa na mayoria di pais, caminda no kier pa pueblo mira berdad. E gobernacion aki lo drenta historia politico di Aruba. Pasobra sin mayoria di voto, a hinca e pais den tanto problema cu hasta e polisnan drumi, mes ta spierta cu susto!
 |
